विनाशकारी रसुवा बाढीमा परी त्रिशूली नदी आसपास निर्माणाधीन विभिन्न जलविद्युत आयोजनाका सुरुङमा फसेका करिब ६ सय कामदारको चार दिन बितिसक्दा पनि उद्धार हुन सकेको छैन।

बाढीका कारण ६० मेगावाटको माथिल्लो त्रिशूली–३ ‘ए’, २१६ मेगावाटको माथिल्लो त्रिशूली–१, २० मेगावाटको लाङटाङ र २२ मेगावाटको चिलिमेलगायत जलविद्युत आयोजनाका सुरुङमा ठूलो संख्यामा कामदार फसेका बताइएको छ।

उद्धारमा ढिलाइ हुँदा सुरुङभित्र रहेका कामदारको अवस्थाबारे परिवार तथा आफन्तजनमा चिन्ता र छटपटी बढ्दै गएको छ। आफन्तहरूले आफ्ना परिवारका सदस्यको तत्काल उद्धारका लागि हारगुहार गरिरहेका छन्।

बाढीपछि सडक तथा पहुँचमार्गमा भएको क्षति र प्रतिकूल परिस्थितिका कारण उद्धार कार्य चुनौतीपूर्ण बनेको बताइएको छ। चार दिनसम्म पनि उद्धार हुन नसकेपछि सुरुङमा रहेका कामदारको अवस्था र उनीहरूलाई सुरक्षित रूपमा बाहिर निकाल्ने प्रयासबारे सर्वत्र चासो र चिन्ता बढेको छ।